Kvar veke presenterer Energi og Klima fem internasjonale nyheitssaker frå veka som har gått. Her er mine utvalde:

1. Grønt eller fossilt – Kina eller USA?

Donald Trump har vore på Asia-turné og møtt Xi Jinping i Sør-Korea. USA og Kina representerer ikkje berre ulike syn i handelspolitikken, men også to motstridande veddemål om framtidas energisystem: kinesiske solceller, batteri og elbilar på den eine sida – amerikansk olje og gass på den andre. Politico forklarar korleis rivaliseringa no spelar seg ut i Asia – ein region der energibruken er venta å auke kraftig. Financial Times tek opp liknande perspektiv i artikkelen The boom in solar – with or without the US.

2. Ventar tredobling av havvind innan 2030

Den britiske regjeringa har offentleggjort budsjettet for neste auksjonsrunde for havvind: 900 millionar pund til botnfast havvind og 180 millionar pund på flytande. Ifølgje Wind Europe vil dette berre gi 5-6 GW i ny kapasitet – langt unna det som trengs om målet om 50 GW i installert havvindkapasitet innan 2030.  

Litt meir optimisme kjem frå Ember, som i ein ny analyse ventar at den globale havvindkapasiteten vert tredobla fram mot 2030 – frå 83 til 238 GW.

3. Ny rapport om helse og klima

Talet på dødsfall som følgje av hete har auka med 23 prosent sidan 1990, sjølv når folkevekst er teken med. I perioden 2020–2024 vart gjennomsnittspersonen utsett for 19 dagar årleg med livstrugande hete – 84 prosent av desse dagane ville ikkje skjedd utan klimaendringar

Det viser årets rapport frå The Lancet Countdown, eit globalt forskingsprosjekt om klima og helse. Les også omtalen av rapporten i The Guardian og på Energi og Klima sin Data-side.

4. Bill Gates åtvarar mot klimaalarmisme!

To veker før årets  klimatoppmøte (COP30) startar i Brasil, har Bill Gates publisert eit ope brev der han åtvarar mot ein alarmistisk klimaagenda, og der han manar til tøffare prioriteringar. Microsoft-gründeren ber om at det i klimasamanheng vert lagt større vekt på helse og velstand. Hev velstandsnivået i fattige land , og fleire vil vere i stand til å tilpasse seg dei klimaendringane som vil skje, skriv han.    

«Noregsvenen» Jeffrey Sachs ved Columbia University kallar brevet «pointless, vague, unhelpful and confusing», ifølgje nyheitsbyrået AP. Mens FT-redaktør Simon Mundy skriv: «Hard questions loom at COP30 summit».

5. Boris Johnson med hard klimakritikk mot eige parti

Tre tidlegare statsministrar frå det konservative partiet har denne veka gått ut mot dagens partileiar, Kemi Badenoch, som vil skrote Storbritannias mål om netto nullutslepp.

Theresa May meiner framlegget vil «fatally undermine» Storbritannias globale klimaleiarskap, medan John Major kallar det å gå i tospann med Nigel Farage for «beyond stupid»:

Til podkasten The Smart Society Show seier Boris Johnson at han ikkje trur partiet vil vinne fleire røyster ved å gå mot klimapolitikken: «I didn’t see us soaring in the polls as a result of saying what rubbish net zero is.»