Debatt

Status for globale fornybarinvesteringar 2013

Dei globale fornybarinvesteringane enda i 2013 på 254 milliardar USD – ned 12 prosent frå 2012. Billegare solenergi er ei av forklaringane, ifølgje Bloomberg New Energy Finance (BNEF).

SONY DSC

Foto: epSos .de (via Flickr)

Det var på Investor Summit on Climate Risk 2014 at BNEF gjorde opp status for dei globale investeringane i fornybar energi og energismart teknologi. BNEFs hovudbodskap var at investeringane i 2013 gjekk ned for andre år på rad, og at det er langt fram til togradarsmålets investeringsbehov på 1 billion USD/år.

USA, Europa, Kina og Japan stod i fjor for 80 prosent av dei globale fornybarinvesteringane. Mens dei tre første opplevde nedgang i investeringane, peika pilene oppover i Japan.

  • I USA gjekk fornybarinvesteringane ned med 8,4 prosent til 48,4 milliardar USD.
  • Investeringane i Kina enda på 61,3 milliardar USD, ned 3,8 prosent i høve til 2012. Dette var første gang på meir enn ti år at Kina opplevde at volumet på fornybarinvesteringane gjekk ned.
  • I Europa gjekk investeringane samla ned med over 40 prosent. I Tyskland sank investeringane frå 26,2 milliardar USD i 2012 til 14,1 milliardar USD 2013. Dette er det lågaste investeringsnivået Tyskland har hatt sidan 2006. Stor nedgang var det og i Frankrike, Italia og Spania. Av dei store EU-landa var det berre Storbritannia som klarte sånn nokolunde å oppretthalde investeringsnivået frå 2012. Med fornybarinvesteringar på 13,1 milliardar USD i 2013 er landet no på same nivå som Tyskland.
  • I Japan derimot var det kjempevekst i fornybarinvesteringane. Totalt vart det investert 35 milliardar USD i fornybar energi og smart energiteknologi i 2013 – eit byks på 55 prosent frå 2012.

Kostnadsreduksjon i solenergi

BNEF meiner det er to hovudgrunnar til at fornybarinvesteringane gjekk ned i 2013:

  1. Kostnadene ved å installere solcellesystem fortsette å falle i 2013, og særleg var dette tilfelle i Europa. Dette blir veldig tydeleg om ein splittar opp fornybarinvesteringane etter teknologi. Den største reduksjonen i investeringar var det for solenergi: frå 142,9 milliardar USD i 2012 til 114,7 milliardar USD i 2013 (-25 prosent).
  2. Svekka tillit hos investorane som følge av endringar i fornybarpolitikken i Europa og USA.

Om du vil ha meir informasjon om dei globale fornybarinvesteringane i 2013 kan du lese denne pressemeldinga og denne presentasjonen frå BNEF.